എന്റെ കടൽക്കര ജീവിതത്തെ അടയാളപ്പെടുത്തിത്തന്നതു ബൈബിളാണ്. പാട്ടുകേൾക്കുന്നവൻ പാട്ടായിത്തീർന്നേക്കാം. വാക്കുകേൾക്കുന്നവൻ വാക്കായും അപാരമായ കടലിലേക്കു ഒരു കുഞ്ഞുവല വളച്ചിട്ടിട്ട് കരയിൽനിന്നു വലിച്ചടുപ്പിക്കുന്ന ഒരു മീൻപിടുത്തവഴിയിൽ പങ്കുചേർന്നിട്ടുണ്ട്. വല നിറയെ കിട്ടാത്ത മീൻ തെന്നിമാറിപ്പോകുന്നതും നീണ്ടു കിടക്കുന്നു എന്നോർമ്മിപ്പിക്കുന്നു. ജലാശയങ്ങളിൽ വച്ച് തല്ലിയലച്ച് എന്നും പുതുമയാർജ്ജിക്കുന്നതു കടൽമാത്രമാണ്. അപാരമായ കടലും ആകാശവും അമ്പരപ്പിക്കുന്നതും മീൻപിടുത്തക്കാരന്റെ അന്വേഷണ വഴികൾ തീരാത്ത അറിവിന്റെ ശ്രോതസ്സിൽനിന്ന് ഒരു കുഞ്ഞു കക്കയിൽ കടൽകോരി വറ്റിക്കാൻ ഇറങ്ങിപ്പുറപ്പെട്ട അതിസാഹസികനായ കുട്ടി മുന്നേ നടക്കുന്നു. ആകാശം ചാഞ്ഞുവന്ന് തീരത്തെ തൊട്ടുരുമി നിന്നപ്പോൾ കടൽ വീഞ്ഞായിമാറി നാഥനെ പുകഴ്ത്തുന്നു. പിന്നെ മുഴങ്ങിയതു മാറ്റത്തിന്റെ ശംഖൊലിയായിരുന്നു. മീൻപിടുത്തക്കാരൻ മനുഷ്യരെ പിടിക്കുന്നവനായി. തീരം പ്രകമ്പനംകൊണ്ടു . ഇടിമിന്നലുകൾ ആകാശത്തുനിന്നും പുറപ്പെടുകയായി ഭൂമി ഇളകി മറിഞ്ഞു. സംവിധാനങ്ങളോടു പൊരുതി. ഒടുവിൽ പിടിക്കപ്പെട്ടു. നിസ്സഹായനായി നിന്നവന്റെ ശിരസ്സിനു മുകളിൽ കൊള്ളിയാൻ മിന്നി.

യോഹന്നാന്റെ സുവിശേഷത്തെ യോഗാത്മകതയുടെ വീക്ഷണകോണിലൂടെ വ്യാഖ്യാനിക്കുന്ന മലയാളത്തിലെ ആദ്യഗ്രന്ഥം . നാലാം സുവിശേഷത്തെ യോഗാത്മക സാഹിത്യം എന്നു രണ്ടാം നൂറ്റാണ്ടിൽത്തന്നെ അലക്സാണ്ട്റിയയിലെ ക്ലെമന്റ് വിശേഷിപ്പിച്ചിട്ടുണ്ട്. അതീന്ദ്രിയ ധ്യാനത്തിലേക്കു നയിക്കുന്ന ആത്മാവിന്റെ ചലനം യോഹന്നാന്റെ സുവിശേഷത്തിൽ സവിശേഷമാംവിധം പ്രകാശിതമാണ്. യോഗാത്മക ദൈവശാസ്ത്രത്തിന്റെ പക്ഷങ്ങളിലേന്തി "നിത്യ സൂര്യനിലേക്കു പറന്നുയരുന്ന പരുന്തി'ന്റെ സഞ്ചാരപഥം വിവരിക്കുകയാണ് റവ. ഡോ. സ്റ്റീഫൻ പുന്നയ്ക്കൽ തന്റെ ഈ "യോഹന്നാന്റെ സുവിശേഷത്തിന്റെ ധ്യാനാത്മക വായന''യിലൂടെ നടത്തുന്നത്. യോഗാത്മകത (mysticism) വളരെ സങ്കീർണമായ ഒരു ആദ്ധ്യാത്മിക പാതയാണ്; എന്നാൽ അത് അനിവാര്യമായ ഒന്നാണുതാനും. ഇരുപതാം നൂറ്റാണ്ടിലെ അഗ്രഗണ്യനായ ദൈവശാസ്ത്രജ്ഞനായിരുന്ന കാൾ റാനർ അഭിപ്രായപ്പെട്ടതനുസരിച്ച്, ഭാവിയിലെ ഒരു ക്രൈസ്തവനു ഒരു യോഗി (mystic) ആകാതിരിക്കാൻ തരമില്ല; അല്ലെങ്കിൽ അവൻ ഒന്നുമല്ലാതായിത്തീരും. ദൈവവുമായുള്ള ഒരു വ്യക്തിപരമായ കണ്ടുമുട്ടലിലൂടെ ലഭ്യമാകുന്ന സ്നേഹനിർഭരമായ ജ്ഞാനത്തെയാണ് സാധാരണയായി യോഗാത്മകത എന്നു വിശേഷിപ്പിക്കുന്നത്. : ഡോ. ജേക്കബ്പ്രസാദ്