1975 സെപ്റ്റംബർ 25. വിദ്യാർഥി യൂണിയന്റെ തിരഞ്ഞെടുക്കപ്പെട്ട കൗൺസിലറായിരുന്ന അശോക ലത ജയ്നിനെ പുറത്താക്കിയതിനെതിരെ പ്രതിഷേധിക്കുന്നതിനായി ഒരു സമരത്തിന് ന്യൂഡൽ‍ഹി ജവഹർലാൽ നെഹ്രു സർവകലാശാലയിലെ വിദ്യാർത്ഥികൾ ആഹ്വാനം ചെയ്തു. മൂന്നു മാസങ്ങൾക്കു മുൻപ്, പ്രധാനമന്ത്രി ഇന്ദിരാ ഗാന്ധി അടിയന്തരാവസ്ഥ പ്രഖ്യാപിച്ചിരുന്നു. ഒരു സംഘം വിദ്യാർത്ഥികളുടെ സമീപത്തേക്ക് ഒരു കാർ വന്നു നിൽക്കുകയും അതിൽ നിന്ന് സാധാരണ വസ്ത്രം ധരിച്ച ഏതാനും പൊലീസുകാർ പുറത്തിറങ്ങുകയും അവരിലൊരാളെ തട്ടിക്കൊണ്ടുപോവുകയും ചെയ്തു. ആ വിദ്യാർത്ഥി അടുത്ത ഒരു വർഷം ജയിലിൽ കഴിഞ്ഞു. 2023 ഒക്ടോബർ 3. ഡൽ‍ഹി പൊലീസിന്റെ സ്പെഷ്യൽ സെല്ലിലെ ഉദ്യോഗസ്ഥർ ഒരു ഓൺലൈൻ വാർത്താ പോർട്ടലിന്റെ സ്ഥാപകനെയും അദ്ദേഹത്തിന്റെ സഹപ്രവർത്തകരെയും യു എ പി എ നിയമപ്രകാരം തടവിലാക്കി. അര നൂറ്റാണ്ടിന്റെ വ്യത്യാസത്തിൽ രണ്ടു ഭരണകൂടങ്ങൾ തടവിലാക്കിയ പ്രബീർ പുർകായസ്തയുടെ കഥയാണ് 'പോരാട്ടം തുടരുക'. ഒരു യുവാവ് രാഷ്ട്രീയ പക്വത പ്രാപിക്കുന്നതിന്റെ കഥ ബുദ്ധിയും നർമോക്തിയും ഉപയോഗിച്ചു പറയുന്ന ഈ പുസ്തകത്തിൽ, ഈ ദശാബ്ദങ്ങൾക്കിടയിൽ ഇന്ത്യയെ ഏറ്റവും അലട്ടുന്ന ചില സാമൂഹിക, രാഷ്ട്രീയ, സാമ്പത്തിക പ്രശ്നങ്ങളിലുള്ള അദ്ദേഹത്തിന്റെ ഇടപെടലുകളും വിശദീകരിക്കുന്നു.