"എല്ലാ ജനവർഗത്തിനും മാനസികോൽക്കർഷവും അഭിജാതചിന്തകളും ആവശ്യമായിരുന്നു. ഭക്തിയെ പോലെ ജനങ്ങളെ പവിത്രീകരിക്കുകയും സമീകരിക്കുകയും ചെയ്യുന്ന മറ്റു വസ്‌തുക്കൾ ദുർലഭമാണ്. ഇതിനെല്ലാം കൂടി ഒരേ സമയം പറ്റുന്ന സാഹിത്യകൃതികൾ രചിക്കേണ്ടതിന്റെ ആവശ്യം എഴുത്തച്‌ഛനു ബോധ്യപ്പെട്ടിരിക്കണം." - ഡോ. കെ എൻ എഴുത്തച്‌ഛൻ എഴുത്തച്‌ഛന്റെ അദ്ധ്യാത്മരാമായണത്തെപ്പറ്റി മലയാളത്തിലുണ്ടായിട്ടുള്ള ആദ്യത്തെ സമഗ്രപഠനമാണിത്. സംസ്‌കൃതത്തിലെ അദ്ധ്യാത്മരാമായണവും എഴുത്തച്‌ഛന്റെ രാമായണവും തമ്മിൽ താരതമ്യം ചെയ്‌ത് എഴുത്തച്‌ഛന്റെ വിവർത്തനകലയിലുള്ള നൂതനത്വം വെളിപ്പെടുത്തുന്നു കെ എൻ എഴുത്തച്‌ഛൻ. രാമഭക്തിപ്രസ്‌ഥാനം തുഞ്ചത്തെഴുത്തച്‌ഛനെ ആകർഷിച്ചത് എന്തുകൊണ്ടാണെന്ന് ഡോ കെ എൻ എഴുത്തച്‌ഛൻ അന്വേഷിക്കുന്നു.

മലയാളഭാഷ ഇന്നു നേരിടുന്ന വെല്ലുവിളികളും ഭീഷണികളും പതിറ്റാണ്ടുകൾക്കു മുൻപ് ദീർഘദർശനം ചെയ്‌ത ധിഷണാശാലിയാണ് എൻ വി കൃഷ്‌ണവാരിയർ. അദ്ദേഹം കൂടുതലും വായിക്കപ്പെട്ടത് കവി, ഗ്രന്ഥകാരൻ, നിരൂപകൻ, പത്രാധിപർ, ബഹുഭാഷാപണ്ഡിതൻ എന്നീ നിലകളിലാണ്. ശാസ്‌ത്ര (ബോധ) പ്രചാരണത്തിനായി നിലകൊണ്ട വിജ്ഞാനസാഹിത്യകാരൻ എന്ന നിലയ്‌ക്കുള്ള അദ്ദേഹത്തിന്റെ സംഭാവനകൾ വേണ്ടവിധം ശ്രദ്ധിക്കപ്പെട്ടിട്ടില്ല. ഈ പുസ്‌തകം ഒരളവുവരെ അതിനൊരു പരിഹാരമാണ്. കേരളത്തിൽ വിജ്ഞാനസാഹിത്യത്തിന്റെയും ശാസ്‌ത്ര പ്രചാരണത്തിന്റെയും സിദ്ധാന്തത്തിലും പ്രയോഗത്തിലും ഒരേപോലെ ഇടപെട്ട ആളായ എൻ വി യുടെ പ്രവർത്തനങ്ങൾ ഇതിൽ വിവരിക്കുന്നു.