മലയാളത്തിലെ ആദ്യത്തെ ബോധധാരാ നോവൽ. മണ്ണിന്റെ മണം തികച്ചും പ്രസരിപ്പിക്കുന്ന മറ്റൊരു ദേശത്തിന്റെ കഥയാണ്  പോഞ്ഞിക്കര റാഫിയുടെ സ്വർഗദൂതൻ. ഒരു പരിഷ്കൃതനഗരത്തിന്റെ നിശ്വാസവിഷവായുശകലങ്ങൾ മാത്രം കൈപ്പറ്റി ഇന്നും അപരിഷ്കൃതഗ്രാമമായിക്കഴിയുന്ന പോഞ്ഞിക്കര ദ്വീപിന്റെ നാലഞ്ചു ദശകങ്ങൾക്കപ്പുറമുള്ള ജീവസുറ്റ ചിത്രം ഇവിടെ വരച്ചുവയ്ക്കപ്പെട്ടിരിക്കുന്നു. മരപ്പണിയും മരവഞ്ചിനിർമാണവും മത്സ്യബന്ധനവും ദാരിദ്ര്യവും രോഗവും അന്ധവിശ്വാസങ്ങളും അനാചാരങ്ങളുമായി കഴിയുന്ന ഒരു ദയനീയ ജനവിഭാഗത്തിന്റെ ഹൃദയസ്പന്ദനം കപ്പൽത്തോട്ടിലൂടെ ഇടയ്ക്കിടെ വന്നും പോയുമിരിക്കുന്ന മോട്ടോർബോട്ടിന്റെ കിതപ്പിനിടയിലും മുഴങ്ങിക്കേൾക്കാം.