അധികാരപ്രമത്തതയും അഴിമതിയുടെ പ്രലോഭനങ്ങളും ഭരണകൂടത്തെയും ഭരണാധികാരികളെയും എത്രമേൽ ജനാധിപത്യവിരുദ്ധവും മനുഷ്യവിരുദ്ധവുമാക്കാം എന്നതിന്റെ സാക്ഷിമൊഴിയാണ് നവാബ് രാജേന്ദ്രന്റെ ജീവിതം. മലയാള മാധ്യമവ്യവസായം അഴിമതിയോടും അധികാരത്തോടും സന്ധിയും സഹകരണവും പ്രഖ്യാപിച്ച നാളുകളിൽ കരുത്തുറ്റ ഒരു ബദൽ സൃഷ്ടിക്കാൻ ശ്രമിച്ചതായിരുന്നു രാജേന്ദ്രന്റെ 'കുറ്റം'. അതിന് അധികാരികൾ വിധിച്ച ശിക്ഷയായിരുന്നു കീറിപ്പറിച്ചെറിഞ്ഞ രാജേന്ദ്രന്റെ മാധ്യമജീവിതം. പൊതുജീവിതത്തിൽ മനുഷ്യർ പുലർത്തേണ്ട സത്യസന്ധതയ്ക്കും സുതാര്യതയ്ക്കും പാഠപുസ്തകം രചിക്കുകയായിരുന്നു നിയമസമരങ്ങളിലൂടെ നവാബ് രാജേന്ദ്രൻ. മനുഷ്യാവകാശത്തെ ഒരു രാഷ്ട്രീയപ്രമേയമായി തിരിച്ചറിഞ്ഞുതുടങ്ങുന്ന ഇക്കാലത്ത്, അത്തരം സമരങ്ങൾ ഇല്ലെങ്കിൽ ജനാധിപത്യം അട്ടിമറിക്കപ്പെടും എന്ന ഭയം പ്രബലമാകുന്ന ഇക്കാലത്ത്, നവാബിന്റെ ഈ ജിവിതകഥ മാധ്യമപഠനത്തിലും നിയമചരിത്രത്തിലും ഒരു പാഠപുസ്തകമാണ്.