ഇടവഴി പൊന്തകളിൽ നാം കണ്ടു കൊണ്ടിരുന്ന മുക്കുറ്റിയും പൂവാംകുരുന്നിലയും മുത്തിളും കഞ്ഞുണ്ണിയും വയൽചുള്ളിയും നൊട്ടങ്ങയും പാണൽ പഴങ്ങളും മഷിത്തണ്ടും ഇല മുളച്ചിയും കുറുന്തോട്ടിയും ഉഴിഞ്ഞയും തിരുതാളിയും തുമ്പയും വെള്ളിലയും തൊട്ടാവാടിയുമൊക്കെ ദിനേനയെന്നോണം കൺമുന്നിൽനിന്നും മാഞ്ഞുകൊണ്ടിരിക്കുന്നു. ഇവയെ തിരിച്ചറിയാനും വേണ്ട രീതിയിൽ സംരക്ഷിക്കാനും നാം ശ്രദ്ധിച്ചേ മതിയാവൂ. ആഹാരമായും ഔഷധമായും ഉപയോഗിക്കാവുന്ന ഇത്തരം നാട്ടുസസ്യങ്ങളെ പരിചയപ്പെടുത്തി അവയുടെ ശാസ്ത്രീയനാമം, ഉൾപ്പെടുന്ന കുടുംബം, അടങ്ങിയിരിക്കുന്ന രാസഘടകങ്ങൾ, നാട്ടറിവുകൾ, ഔഷധ ഗുണങ്ങൾ, പോഷകഗുണങ്ങൾ, ബന്ധപ്പെട്ട ചൊല്ലുകൾ തുടങ്ങിയ വിവരങ്ങൾ ഉൾക്കൊള്ളിച്ച് തയാറാക്കിയ പുസ്തകം.