Nammude Drusyakalakalile Natakeeyamsangal

നാടകകലയുമായി ബന്ധപ്പെട്ട 18 ലേഖനങ്ങളാണ് ഈ പുസ്തകത്തിൽ ഉൾക്കൊള്ളിച്ചിരിക്കുന്നത്. അനുഭവം, അരങ്ങ്, ആസ്വാദനം, എന്നിങ്ങനെ മൂന്ന് വിഭാഗങ്ങളായി തിരിച്ചിട്ടുള്ള ലേഖനങ്ങളിലെ 'അനുഭവ' ത്തിൽ ഒരു നടനെന്ന നിലയിൽ ലേഖകൻ പ്രവർത്തിച്ചിട്ടുള്ള രംഗാവതരണങ്ങളെ പഠനാത്മകമായ രീതിയിൽ വിശകലനം ചെയ്യാനാണ് ശ്രമിച്ചിട്ടുള്ളത്. അരങ്ങിൽ ഭാരതീയവും കേരളവുമായ നാടകചരിത്രമേഖലകളെയും കേരളത്തിലെ അദ്വിതീയരായ നാടക പ്രവർത്തകരിൽ ചിലരുടെ നാടക പ്രവർത്തനങ്ങളെയും വിശകലനം ചെയ്തിരിക്കുന്നു. ആസ്വാദനത്തിൽ കേരളീയ നാടകവേദിയിൽ ശ്രദ്ധേയമായ ചില നാടകാവതരണങ്ങളെയും നാടകോത്സവങ്ങളെയും കുറിച്ചാണ് പ്രതിപാദിക്കുന്നത്.

രചിതപാഠത്തിൽ നിന്ന് രംഗപാഠത്തിലേക്ക് ഒരു നാടകം പരുവപ്പെടുന്നതെങ്ങനെ എന്നു വിശദീകരിക്കുന്ന ലേഖനങ്ങളാണ് ഈ പുസ്തകത്തിൽ. അരങ്ങിന്റെ സാംസ്കാരിക രാഷ്ട്രീയം, പുതിയ നാടകവേദിയുടെ സാംസ്കാരിക സാങ്കേതിക പരിസരം, കലയിലും രാഷ്ട്രീയത്തിലും നടക്കുന്ന ആഗോള പരിവർത്തനങ്ങൾ ഇന്ത്യൻ നാടകവേദിയിൽ സൃഷ്ടിക്കുന്ന ഭാവുകത്വ പരിണാമം, അതിന്റെ രാഷ്ട്രീയ വിവക്ഷകൾ എന്നിവ വിശകലനം ചെയ്യുന്ന ഈ ലേഖനങ്ങൾ മലയാളത്തിൽ അപൂർവമായ രംഗാവതരണ പഠനങ്ങളുടെ മികച്ച മാതൃകകളാണ്. നാടകവേദിയുടെ പ്രയോഗവും സൈദ്ധാന്തിക സമീപനങ്ങളും ഈ ലേഖനങ്ങളിൽ ഇഴ ചേർന്നു നിൽക്കുന്നു.