Paadam Onnu

സത്യത്തിൽ എന്താണ് ഭാഗ്യം?

• ഇന്ന് ഒരു നേരം കഴിക്കാനുള്ള ആഹാരമുണ്ടോ?
• മഴയത്തു ചോരാത്ത മേല്‍ക്കൂരയുണ്ടോ വീടിന്?
• കൊള്ളാവുന്ന ഒരു ജോഡി വസ്ത്രമുണ്ടോ?

മൂന്നിനും ഉത്തരം 'ഉണ്ട്' എന്നാണെങ്കിൽ തീര്‍ച്ചയായും ഭാഗ്യശാലിയാണ് നിങ്ങൾ. വെറും ഭാഗ്യശാലിയല്ല, ലോകത്തിലെ ഏറ്റവും വലിയ ഭാഗ്യശാലികളുടെ കൂട്ടത്തിലാണ് നിങ്ങളുടെ സ്ഥാനം. ബാക്കിയുള്ളതൊക്കെ ബോണസ്സായി കരുതണം. സ്വന്തം ജീവിതാനുഭവങ്ങളുടെ വെളിച്ചത്തിൽ നിന്നൊരു വിഹിതം കടൽവിളക്കു പോലെ തെളിയിച്ച്, വായനക്കാരുടെ ജീവിതത്തെ വിജയത്തിന്റെയും സന്തോഷത്തിന്റെയും തീരങ്ങളിലേക്ക് തിരിച്ചുവിടുന്ന ഡോ. സുരേഷ് സി. പിള്ളയുടെ ലേഖനസമാഹാരം.

വിജ്ഞാനത്തിന്റെയും വിജയത്തിന്റെയും സമാധാനത്തിന്റെയും സന്തോഷത്തിന്റെയും വലിയ രഹസ്യങ്ങൾ ഒരു നാനോശാസ്ത്രജ്ഞനു ചേർന്ന കൈയടക്കത്തോടെ ചെറിയ കുറിപ്പുകളിൽ ഒതുക്കിയിരിക്കുകയാണ് ഡോ. സുരേഷ് സി. പിള്ള.  പ്രായത്തിന്റെയും അറിവിന്റെയും ഏതു ഘട്ടത്തിൽ നിൽക്കുന്നയാളായാലും ഈ പുസ്തകത്തിന് നിങ്ങളോടു പറയാൻ എന്തെങ്കിലുമൊന്ന് ഉണ്ടാവും. ഇതിലാകെ പരന്നുകിടക്കുന്ന ജീവിതത്തിന്റെ തന്മാത്രകളിൽ വായനക്കാരെ വഴി തിരിച്ചുവിടാനുള്ള വെളിച്ചം നിറഞ്ഞിരിക്കുന്നു.
-ബെന്യാമിൻ

'ഞാന്‍ ഞാന്‍' എന്നഹങ്കരിക്കുന്ന ഓരോ രാജാവിന്റെയും രാജ്ഞിയുടെയും മുന്നില്‍ സുരേഷ് വച്ചുതരുന്ന കണ്ണാടികള്‍, സത്യത്തില്‍ വഴികാട്ടികളാണ്. അതില്‍ തെളിഞ്ഞുവരുന്ന കോമാളിധാരണകളുമായി നമ്മള്‍ വേഗം താദാത്മ്യം പ്രാപിക്കും. അവ കണ്ട് നമുക്കുതന്നെ ചിരിവരും. കണ്ണാടിപ്പശ്ചാത്തലത്തിലെ അബദ്ധകോകിലങ്ങളെ സ്വയം തിരുത്തണമെന്നു നമുക്കുതന്നെ തോന്നുകയും ചെയ്യും. ഈ പുസ്തകം വായിച്ച് സ്വയം തിരുത്തുന്ന ഒരുപാടു പേരുണ്ടാവും എന്നുതന്നെ ഞാന്‍ കരുതുന്നു.
-പ്രിയ എ. എസ്.